ट्रायथोलनमा नेपालकी सोनीले जिताईन पहिलो स्वर्ण

पोखरा, १६ मङ्सिर
१३ औं दक्षिण एसियाली खेलकुद प्रतियोगिता (साग) मा ट्रायथोलनको ईलाईट स्प्रिन्टमा  नेपालकी सोनी गुरुङले नेपाललाई पहिलो स्वर्ण जिताएकी छिन् ।

पोखरामा भएको महिला खेलमा ट्रायथोलनमा उनले दक्षिण एशियामा पावर मानिने भारतलाई पछि पार्दै स्वण पदक हात पारेकी हुन् । उनले निर्धारित ७५० मिटर पौडी, २० कि.मी. साइक्लिङ र ५ किलोमिटर दौड १ घन्टा १३ मिनट ४५ सेकेन्डमा पुरा गर्दै स्वर्ण हात पारेकी हुन् । 

पौडीमा तेस्रो भएकी सोनी साइक्लिङमा दोस्रो भएकी थिइन् भने दौडमा पहिलो हुदै स्वर्ण हात पारेकी हुन्। साग अन्तर्गत ट्रायथोलनमा नेपालले जितेको यो पहिलो स्वर्ण हो । उक्त खेलको रजत र कास्य पदक भने भारतले जितेको छ ।

पुरुषतर्फ नेपालका बसन्त थारुले कास्य पदकमा चित्त बुझाएका छन् । उनले निर्धारित दूरी १ घन्टा ३ मिनट र ०६ सेकेन्डमा पुरा गरे ।